Գազայի հատվածում մեկ օրում 47 մարդ է զոհվել իսրայելական հարձակումների հետևանքով
Международное
Գազայի հատվածում Իսրայելի օդային հարվածների և հրետակոծությունների հետևանքով սեպտեմբերի 26-ին 47 մարդ է զոհվել։
«Արմենպրես»-ի փոխանցմամբ՝ այս մասին հայտնում են Գազայի առողջապահական աղբյուրները։
Al Jazeera-ի տեղեկացմամբ՝ իսրայելական օդուժը շարունակում է թիրախավորել Գազա քաղաքից արևմուտք գտնվող աշ-Շատի փախստականների ճամբարը, ան-Նասր և առ-Ռամալ թաղամասերը, ինչպես նաև Խան Յունիս քաղաքը։
Առողջապահության համաշխարհային կազմակերպության խոսնակը հայտնել է, որ առողջապահական իրավիճակը Գազա քաղաքում ռազմական գործողությունների պատճառով ավելի է վատթարանում։
«Մենք ունենք ավելի քան 15000 մարդ, այդ թվում՝ մեծ թվով երեխաներ, որոնք բուժման կարիք ունեն,- նշել է նա»։
Կատարի վարչապետ և արտաքին գործերի նախարար շեյխ Մուհամմադ բին Աբդ ալ-Ռահման ալ-Թանին հայտարարել է, որ այն, ինչ անում է Իսրայելը, վտանգում է տարածաշրջանի անվտանգությունը և ամերիկյան շահերը։
«Այն, ինչ անում է Իսրայելը, խաթարում է այն գործընկերությունները, որոնք Վաշինգտոնը կառուցել է տարածաշրջանում տասնամյակների ընթացքում։
Արաբական աշխարհն ակնկալում է, որ նախագահ Թրամփը կնպաստի Գազայում խաղաղության հաստատմանը»,- նշել է նա՝ հավելելով, որ Թրամփը միակն է, ով կարող է զսպել Նեթանյահուին։
Գազայի առողջապահության նախարարությունը տեղեկացրել է, որ 2023 թվականի հոկտեմբերի 7-ից վեր իսրայելական հարձակումների հետևանքով զոհված պաղեստինցիների թիվը հասել է 65 հազար 549, վիրավորվել է 167 հազար 518 մարդ, որոնց թվում զգալի թիվ են կազմում կանայք և երեխաները։
2023 թվականին Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր գրեթե 1200 մարդ, գերեվարվել՝ շուրջ 250 մարդ։
