Վրաստանում «գողական աշխարհի» դեմ հատուկ գործողության շրջանակներում ձերբակալվել է 30 մարդ
Право
Վրաստանում «գողական աշխարհի» դեմ հատուկ գործողության շրջանակներում ձերբակալվել է 30 մարդ։ Այս մասին այսօր ճեպազրույցի ժամանակ հայտարարել է Վրաստանի ՆԳՆ ներկայացուցիչ Թորնիկե Մարսագիշվիլին, հաղորդում է Georgia Online-ը։
Հետաքննությունը պարզել է, որ մեղադրյալները կապեր են ունեցել արտասահմանում գտնվող «օրենքով գողերի» հետ և կատարել են նրանց հրահանգները։ Նրանք կազմակերպել են «գողական բախումներ» և լուծել ֆինանսական վեճերը՝ քրեական հեղինակությունների ներգրավմամբ։
Վիճաբանող կողմերից մեկը, ի վերջո, ստիպված էր լինում գումար վճարել և՛ իր հակառակորդին, և՛ միջնորդներին։ Եթե վճարումները ուշանում էին, քաղաքացիներին սպառնում էին սպանությամբ։
Մեղադրյալների տների խուզարկություններից հետո ոստիկանությունը որպես ապացույց առգրավել է համակարգչային սարքավորումներ և բջջային հեռախոսներ, որոնք նրանք օգտագործել են միմյանց հետ և արտասահմանում գտնվող «օրենքով գողերի» հետ շփվելու համար, հրազեն և կանխիկ գումար։
Ձերբակալվածներից 19-ին մեղադրանք է առաջադրվել «գողական աշխարհի անդամներին դիմելու», յոթին՝ «գողական աշխարհի գործունեությանը աջակցելու», իսկ ևս չորսին՝ «անդամակցության» համար։
Հեռակա կարգով մեղադրանք է առաջադրվել «օրենքով գող» Թենգիզ Խոպերիային՝ «Չինկա» մականունով, ինչպես նաև նրա հանցակցին, որոնք Վրաստանում չեն։
Գործի քննությունը շարունակվում է։ Մեղադրյալներին սպառնում է մինչև 15 տարվա ազատազրկում։
