Սիսիանում այսօր մեկնարկում է Երևանի կարճամետրաժ ֆիլմերի 8-րդ միջազգային կինոփառատոնը
Культура
Այսօր՝ հունիսի 26-ին, Սիսիան քաղաքում կմեկնարկի Երևանի կարճամետրաժ ֆիլմերի 8-րդ միջազգային կինոփառատոնը: Այս տարի ստացվել է 850 ֆիլմի հայտ, որից ծրագրում ընդգրկվել է 44-ը: Ցանկը տարեցտարի ընդլայնվում է, ընդգծում են փառատոնի կազմակերպիչները, ինչը վկայում է, որ ուշադրությունը դեպի երևանյան կինոփառատոնը ավելանում է: Կինոփառատոնի տնօրեն Գուժ Թադևոսյանի խոսքով՝ փառատոնի շրջանակներում սպասվում են կինոդիտումներ, քննարկումներ, վարպետաց դասեր ու փորձի փոխանակում: Փառատոնի բոլոր միջոցառումների մուտքն անվճար է։ Հանդիսատեսը հնարավորություն կունենա դիտելու միջազգային հեղինակավոր կինոփառատոնների մրցանակակիր կարճամետրաժ ֆիլմերը:
Փառատոնի բացման արարողությունը տեղի կունենա Սիսիանում։ Հունիսի 27-ին «Զորաց քարեր»-ի հարևանությամբ էլեկտրոնային երաժշտության բացօթյա համերգ կլինի։ Այն կամփոփվի հունիսի 29-ի երեկոյան Երևանի մանկական զբոսայգում, որտեղ կցուցադրվեն փառատոնին ներկայացված ֆիլմերը։
Երևանի կարճամետրաժ ֆիլմերի միջազգային կինոփառատոնը հիմնադրվել է 2018 թվականին՝ կինոռեժիսոր, պրոդյուսեր Գուժ Թադևոսյանի կողմից։ Այն filmfreeway.com հարթակում ոսկե կարգավիճակ ունեցող կինոփառատոներից է։ Փառատոնի գեղարվետական ղեկավարը կինոօպերատոր և լուսանկարիչ Սուրեն Թադևոսյանն է, իսկ ծրագրերի ղեկավարը՝ ռեժիսոր, սցենարիստ Արտյոմ Բաղդասարյանը։ Փառատոնի նպատակն է բացահայտել երիտասարդ և տաղանդավոր ստեղծագործողների, նպաստել նրանց մասնագիտական կարողությունների զարգացմանը, տարբեր երկրների երիտասարդ կինոգործիչների բարեկամական և ստեղծագործական կապերի ամրապնդմանը, նոր կինոսերնդի ձևավորմանը, օժանդակել երիտասարդ ստեղծագործողներին՝ գտնելու իրենց տեղը ժամանակակից կինոյում, ամրապնդել կապը Հայաստանի և օտարերկյա կինոգործիչների միջև, իրականացնել փորձի փոխանակում:
