Պետծառայողներին պարտադրում են հայտարարագրեր ներկայացնել

Դժգոհության ու շփոթի մեծ ալիք բարձրացրած եկամուտների հայտարարագրման վերջնաժամկետը փոխվել է, Ազգային ժողովն ընդունել է օրենքը, որով Հայաստանի ավելի քան 700 հազար քաղաքացիներ 2025-ին և 2026-ին իրենց հայտարարագրերը կարող են ներկայացնել մինչև նոյեմբերի 1-ը՝ մայիսի 1-ի փոխարեն: Օրենքի առաջին ընթերցմանը կողմ են քվեարկել իշխող ուժի 63 պատգամավորներ։

Նախագծի հեղինակ Բաբկեն Թունյանի խոսքով, այն մարդկանց համար, ովքեր հայտարարագիր են լրացնում այս տարի նախորդ տարվա եկամուտների համար, հայտարարագրերի ներկայացման վերջնաժամկետը սահմանվում է նոյեմբերի 1–ը, և ովքեր հայտարարագիր են լրացնելու հաջորդ տարի այս տարվա եկամուտների համար, իրենց համար նույնպես դառնում է նոյեմբերի 1–ը: Զուգահեռաբար դրանից հետո հայտարարագրերի ներկայացման վերջնաժամկետ է դառնում հուլիսի 1-ը։

Այդուհանդերձ, պետական կառավարման համակարգը ձախողած ՔՊ-ն շտապում է, ցանկանում է ցույց տալ, որ հայտարարագրեր ներկայացնողները շատ են, ուստի վարչապետի աշխատակազմից հանձնարարել են մինչև մայիսի 1-ը հնարավորինս շատ հայտարարագրեր ներկայացնել ՊԵԿ։ Ովքեր ունեն ID-քարտեր, պարտադրված են արագ լրացնել և ներկայացնել փաստաթղթերը, հակառակ պարագայում խնդիրներ են ունենալու աշխատավայրերում։

Մարինե Գևորգյան