Որ երկրների հետ են սահմանները բացվելու
Օդային ճանապարհով օտարերկրյա քաղաքացիների մուտքի արգելքը հանվել է, բայց ցամաքային սահմանով սահմանափակումը շարունակում է գործել։ Այս մասին ԱԺ հատուկ նիստի ժամանակ հայտարարեց փոխվարչապետ, պարետ Տիգրան Ավինյանը։
«Օտարերկրյա քաղաքացիների համար ժամանակավորապես հանվել է սահմանային անցման կետերում մուտքի վիզա ստանալու հնարավորությունը, և նրանք Հայաստան կարող են ժամանել միայն արտերկրում մեր դիվանագիտական ներկայացուցչություններում կամ հյուպատոսական հիմնարկներում տրված վիզայի կամ էլեկտրոնային մուտքի վիզայի հիման վրա։ Այս կարգավորմամբ նպատակ է դրվել բարձրացնել անձանց ներհոսքի կառավարելիությունն ու կանխատեսելիությունը»,-ասաց Տիգրան Ավինյանը՝ նշելով, որ փոփոխություններ են արվել նաև արտերկրից ժամանող անձանց ինքնամեկուսացման ընթացակարգերում և, որ Հայաստանի տարածք մուտք գործող անձը, եթե չի հոսպիտալացվել կարող է իր ընտրությամբ կա՛մ ինքնամեկուսանալ, կա՛մ էլ ինքնամեկուսացման ընթացքում ՊՇՌ հետազոտություն անցնել և թեստի բացասական արդյունքի դեպքում դուրս գալ ինքնամեկուսացումից։
«Լուսավոր Հայաստան» խմբակցության ղեկավար Էդմոն Մարուքյանն էլ հետաքրքրվեց, թե արդյոք պարետը կամ վարչապետը Ռուսաստանի նախագահի հետ բանակցություններ սկսե՞լ են, որ Հայաստանում հազարավոր արտագնա աշխատող մարդիկ կարողանան գնալ ՌԴ և աշխատել այնտեղ, որտեղ ունեն աշխատատեղեր:
Ավինյանը նշեց, որ Ռուսաստանի Դաշնությունը հրապարակայնորեն պատրաստակամություն է հայտնել սահմանները երկկողմանի բացելու հետ կապված և արդեն անհատական բանակցություններ են գնում:
Ինչ վերաբերում է Վրաստանին, ապա նրանց հետ այս փուլում որևէ բանակցություն չկա սահմանների բացման հետ կապված: իսկ ինչ վերաբերում է անհատական ավտոմեքենաներով Վրաստանից ՀՀ քաղաքացիների վերադարձին Ավինյանն ասաց, որ նախկինում եղել են ավտոբուսներով տեղափոխումներ, դրանք կազմակերպվել են մեր հյուպատոսության աշխատանքների շնորհիվ:
