ԱՄՆ-ն Ռուսաստանին տեղեկատվություն է փոխանցել նրա վերաբերյալ, որ Crocus City Hall համալիրը կարող է դառնալ ահաբեկիչների պոտենցիալ թիրախ. նախազգուշացումն արվել է մարտի 22-ի հարձակումից ավելի քան երկու շաբաթ առաջ, գրում է The Washington Post-ը՝ վկայակոչելով ամերիկացի պաշտոնյաների շրջաններում աղբյուրների։
Ըստ թերթի զրուցակիցների՝ Վաշինգտոնը տվյալները փոխանցել է Մոսկվային Ռուսաստանում ԱՄՆ դեսպանատան հրապարակային հաղորդագրությանը հրապարակելուց մեկ օր առաջ՝ մարտի վեցին: Իսկ հաջորդ օրը դեսպանատունը հաղորդագրություն է հրապարակել այն մասին, որ Մոսկվայում (այդ թվում՝ համերգների անցկացման վայրերում) հնարավոր ահաբեկչության սպառնալիք կա:
Հիշեցնենք, որ մարտի 22-ի երեկոյան մի խումբ զինված տղամարդիկ ինքնաձիգներից կրակ են բացել Մոսկվայի Crocus City Hall-ում, ինչից հետո տեղում պայթյուն է տեղի ունեցել և հրդեհ է բռնկվել: Հաղորդվել է 144 զոհի մասին: ՌԴ ԱԴԾ-ն հայտարարել է, որ մարդկանց վրա կրակած ահաբեկիչները ձերբակալվել են Ռուսաստանի Դաշնության Բրյանսկի շրջանում՝ Ուկրաինայի հետ սահմանի մոտ, և որ նրանք ուղևորվում էին Ուկրաինա, քանի որ «այնտեղ կապեր ունեն»։ ՌԴ նախագահ Վլադիմիր Պուտինի խոսքով՝ ահաբեկչության համար կասկածվողների համար «պատուհան էր պատրաստվել Ուկրաինայի հետ սահմանը հատելու համար»։ Ուկրաինական հետախուզությունը հայտարարել է, որ Ռուսաստանի տարածած վարկածը, թե Մոսկվայի մարզում ահաբեկչության հեղինակները փախուստի էին դիմում Ուկրաինա, իրականությանը չի համապատասխանում:
