Այդքան արագ կորցրի՞ք ձեր խիղճն ու մոռացա՞ք հոկտեմբերի 7-ը. Նեթանյահուն մեղադրել է միջազգային հանրությանը
Международное
Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Իսրայելի վարչապետ Բենիամին Նեթանյահուն միջազգային հանրությանը մեղադրել է «կարճ հիշողություն» ունենալու՝ 2023 թվականի հոկտեմբերի 7-ին Իսրայելի քաղաքացիների վրա ՀԱՄԱՍ-ի «դաժան հարձակումը» մոռացության մատնելու համար։
Այս մեղադրանքին նախորդել էր ԱՄՆ Սենատի դեմոկրատական մեծամասնության առաջնորդ Չակ Շումերի քննադատությունը՝ ուղղված Իսրայելի կառավարությանը, ինչպես նաև երկրում նոր ընտրություններ անցկացնելու կոչը։
«Այսքան արագ մոռացա՞ք հոկտեմբերի 7-ը՝ Հոլոքոստից հետո հրեաների ամենասարսափելի կոտորածը: Դուք այդքան շտապեցի՞ք Իսրայելին ՀԱՄԱՍ-ի հրեշներից պաշտպանվելու իրավունքի հարցում մերժելու համար: Իսկապես այդքան արագ կորցրի՞ք ձեր խիղճը», - ասել է Նեթանյահուն CNN-ին տված հարցազրույցում:
Մեկնաբանելով Իսրայելում ընտրություններ անցկացնելու Չակ Շումերի կոչը՝ Բենիամին Նեթանյահուն ասել է, որ սենատորի խոսքերը «բոլորովին տեղին չեն»։ Իսրայելի վարչապետը կարծում է, որ երկիրը պետք է կենտրոնանա ՀԱՄԱՍ-ի ոչնչացման վրա, և «ծիծաղելի» է պատերազմական գործողությունների ժամանակ խոսել ընտրությունների մասին։
Մարտի 14-ին Չակ Շումերն ասել էր, որ Նեթանյահուի կոալիցիան այլևս չի բավարարում Իսրայելի կարիքները 2023 թվականի հոկտեմբերի 7-ից հետո, երբ ՀԱՄԱՍ-ի զինյալները ներխուժել են Իսրայելի տարածք: Իսրայելի կառավարության հայեցակարգը «խրված է անցյալում», նշել է սենատորը։
Ինչպես մարտի սկզբին հայտնել է Reuters-ը, Կոնգրեսում ԱՄՆ Դեմոկրատական կուսակցության անդամները կոչ են արել նախագահ Ջո Բայդենի վարչակազմին ստիպել Իսրայելին կանխել հումանիտար ճգնաժամը Գազայի հատվածում։ Հակառակ դեպքում նրանք կոչ են անում հրաժարվել Իսրայելին ռազմական օգնություն ուղարկելուց։
