Զենքի գործադրմամբ խուլիգանություն, գույքի վնասում՝ Աղավնավանքում, 9 անձի նկատմամբ հանրային քրեական հետապնդում է հարուցվել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

2023 թվականի նոյեմբերի 12-ին  հաղորդումներ են ստացվել առ այն, որ նշված օրը Աղավնավանք բնակավայրում գործող գինետան մոտ տեղի է ունեցել վիճաբանություն մի խումբ անձանց միջև, որի ընթացքում դրա մասնակից 2 անձինք  ծեծի են ենթարկվել, հնչել են կրակոցներ, ինչպես նաև վնասվել են ավտոմեքենաներ:

Դեպքի առթիվ ՀՀ քննչական կոմիտեի Տավուշի մարզային քննչական վարչության Դիլիջանի քննչական բաժնում նախաձեռնվել է քրեական վարույթ ՀՀ քրեական օրենսգրքի 195-րդ հոդվածի 2-րդ մասի 5-րդ կետի (2 դրվագ), 297-րդ հոդվածի 3-րդ մասի, 264-րդ հոդվածի 2-րդ մասի 1-ին կետի, 335-րդ հոդվածի 1-ին մասի հատկանիշներով: Ձևավորվել է քննչական խումբ, սկսված նախաքննության շրջանակներում իրականացվել են անհետաձգելի քննչական, վարութային գործողություններ, ինչպես նաև օպերատիվ-հետախուզական միջոցառումներ։

Աղավնավանք բնակավայրում հաստատված 24-ամյա մի երիտասարդ ու նույն գյուղի 51-ամյա մի բնակիչ ճանաչվել են տուժող: Կատարվել է դեպքի վայրի զննություն, որի արդյունքում հայտնաբերվել են արնանման հետքեր, պարկուճներ, շուրջ մեկ տասնյակի հասնող վնասված՝ տարբեր մակնիշների ավոտմեքենաներ, որոնք տեղափոխվել են հատուկ պահպանվող տարածք: Առգրավվել է գինետան տեսախցիկների հիշասարքը, նշանակվել են մի շարք փորձաքննություններ:

Քննությամբ նախնական փաստական տվյալներ են ձեռք բերվել այն մասին, որ դեպքից մի քանի օր առաջ  անօդաչու թռչող սարք (դրոն) գործարկելու հետ կապված վիճաբանություն է տեղի ունեցել  մեկ անձի և 24-ամյա երիտասարդի միջև, որի ժամանակ վերջինս դեմքին ստացել է հարվածներ:

Այդ ամենի մասին երիտասարդը պատմել է 51-ամյա համագյուղացուն: Նոյեմբերի 12-ին` ժամը 18:00-ից 19:00-ի սահմաններում, նախօրոք գյուղ ժամանած իր ընկերների հետ նույն անձը հանդիպել է 24-ամյա Ա.Մ-ին, նրա 51-ամյա համագյուղացուն ու վերջինիս եղբորը, ապա շուրջ 10 հոգով ծեծի ենթարկել նրանց: Այդ ընթացքում նաև հնչել են կրակոցներ։  

Վերը նշված հանցագործությունը կատարած լինելու անմիջականորեն ծագած կասկածի հիման վրա նոյեմբերի 13-ին ձերբակալվել են միջադեպի մասնակից, մայրաքաղաքի, հանրապետության մի քանի մարզերի տարբեր համայնքերի 7 բնակիչներ:

Ձեռք բերված փաստերի հիման վրա վերջիններիս ներկայացվել են մեղադրանքներ։ Հանրային քրեական հետապնդում է հարուցվել ևս 2 անձի նկատմամբ և որոշում է կայացվել դատարան ներկայացնելու համար նրանց ձերբակալելու վերաբերյալ։ Ոստիկանությանը տրվել է նշված 2 անձանց գտնելու և վարույթն իրականացնող մարմինին ներկայացնելու հանձնարարություն։

Նախաքննությունը շարունակվում է։ Ձեռնարկվում են բոլոր անհրաժեշտ միջոցները՝ միջադեպի մասնակիցների շրջանակն ամբողջականացնելու, նրանց արարքներին իրավական գնահատական տալու համար։

Ծանուցում.Հանցանքի համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով դատարանի` օրինական ուժի մեջ մտած դատավճռով: