4.827.643 դրամ՝ «Զինվորի տուն» վերականգնողական կենտրոնին․ «Մի դրամի ուժի» նոյեմբեր ամսվա շահառուն «Արեն Մեհրաբյան» հիմնադրամն է
ЭкономикаՕրեր առաջ Իդրամն ու IDBank-ը ամփոփեցին «Մի դրամի ուժը» նախաձեռնության հոկտեմբեր ամսվա ծրագիրը։ Կուտակված ողջ գումարը՝ 4.827.643 դրամ, փոխանցվեց «Զինվորի տուն» վերականգնողական կենտրոնին։
Սա Իդրամի և IDBank-ի հետ «Զինվորի տան» երկրորդ համագործակցությունն էր։ Այս անգամ ևս նվիրաբերված գումարը կուղղվի զինհաշմանդամների համար իրականացվող ծրագրերին՝ նպաստելով նրանց առողջության վերականգնմանն ու սոցիալական խնդիրների լուծմանը։
Ընկերությունները նաև հայտարարեցին նոյեմբեր ամսվա շահառուին․ Idram&IDBank հավելվածով, IDBanking.am առցանց հարթակով, Իդրամով կամ ընկերությունների տերմինալներով կատարվող վճարումներից նոյեմբեր ամսվա ընթացքում կուտակված ամբողջ գումարը փոխանցվելու է «Արեն Մեհրաբյան» բարեգործական հիմնադրամին։
«Արեն Մեհրաբյան» բարեգործական հիմնադրամը ստեղծվել է Արեն Մեհրաբյանի մեծ ընտանիքի նախաձեռնությամբ, որի հիմքում ավագ որդու՝ 44-օրյա պատերազմում զոհված Արենի երազանքն է՝ հիմնել աէրոտիեզերական շարժիչների և ուղղահայաց վերելքով ու վայրէջքով թռչող Էլեկտրական սարքերի (eVTOL) մեքենաշինական արտադրություն Հայաստանում, այսպիսով հիմք դնելով հայկական տիեզերական ծրագրին:
Բանկի հաղորդակցման բաժնի ղեկավար Տաթևիկ Վարդևանյանի խոսքով՝ կրթությունը Բանկի և Իդրամի համար ԿՍՊ հիմնական ուղղություն է, և առաջին անգամ չէ, որ «Մի դրամի ուժի» կուտակած գումարները պետք է ուղղվեն կրթական ոլորտի զարգացմանը։ «Արենի ծնողներն իրենց որդու երազանքն իրականություն դարձնելու համար հիմնադրամ են ստեղծել, որի միջոցով ներկայում կրթում են 44-օրյա պատերազմի մասնակից 120 երիտասարդի։ Նրանք ստանում են աշխարհում խիստ պահանջված մասնագիտացումներով կրթություն և որ հատկապես կարևոր է դասընթացների ավարտից հետո ապահովվում են նաև աշխատանքով։ Չնայած սա ամենափոքր բանն է, որ կարող ենք անել նման մեծ առաքելություն ունեցող հիմնադրամի համար, հույս ունենք, որ սա վարակիչ օրինակ կլինի նաև մի շարք կազմակերպությունների համար, որովհետև որակյալ կրթությունը մեր ապագայի հիմնասյունն է», - ասել է Տաթևիկ Վարդևանյանը։
«Արեն Մեհրաբյան» հիմնադրամը ստեղծել է կրթական մի համակարգ, որը կարճաժամկետ տեխնիկական դասընթացների միջոցով անվճար կրթություն է տրամադրում 44–օրյա պատերազմի մասնակիցներին, պատերազմի արդյունքում հաշմանդամ դարձածներին, զոհված զինծառայողների ընտանիքի անդամներին, ինչպես նաև՝ բոլոր նրանց ովքեր ցանկանում են կրթվել մեքենաշինական ինժեներության, ծրագրավորման և աէրոտիեզերական ինժեներության ոլորտում։
«Արեն Մեհրաբյան» հիմնադրամի հիմնադիր տնօրեն Մհեր Մեհրաբյանի խոսքով՝ «Մի դրամի ուժը» հնարավորություն է ստեղծում պատերազմի ընթացքում իրենց առողջությունը չխնայած մեր հայրենակիցների համար անհնարին թվացող կրթական ծրագրերը կյանքի կոչել: «Ծրագիրն ապացուցել է, որ համախմբվածության, հետևողական ու պրոֆեսիոնալ թիմի աշխատանքի շնորհիվ անհնարինը հնարավոր է դառնում։ Դժվար է կտրվել առօրեականությունից և լուծել ապագայի խնդիրները։ «Մի դրամի ուժը» նախաձեռնությունը թերևս հանդիսանում է այն կամուրջը, որը կապում է առօրեականությունը մեր երիտասարդների ապագայի կերտման հետ»,- ասել է Մհեր Մեհրաբյանը։
Բոլորս կարող ենք դառնալ բարի կամքի դեսպան՝ աջակցելով մի շարք կենսական կարևորության կազմակերպությունների, հիմնադրամների՝ պարզապես կատարելով վճարումները Idram&IDBank հավելվածով, IDBanking.am առցանց հարթակով, Իդրամով կամ ընկերությունների տերմինալներով։
ԸՆԿԵՐՈՒԹՅՈՒՆՆԵՐԸ ՎԵՐԱՀՍԿՎՈՒՄ ԵՆ ՀՀ ԿԲ ԿՈՂՄԻՑ
