Չալաբյանն իր նվիրումով և պոտենցիալով մրցակից է իշխանության համար. Կարին Տոնոյան

Մայիսի 17-ից՝ Ֆրանսիայի հրապարակում, «5165 շարժման» համախմբման վրանի մոտ իրականացվում է ստորագրահավաք` բոլոր քաղբանտարկյալներին ազատ արձակելու պահանջով։
 
Շարժման անդամները պահանջում են ՀՀ իշխանություններից ազատ արձակել քաղբանտարկյալներ Արամայիս Մխիթարյանին, Ազատ Մուրադյանին, Ալեքսան Ալեքսանյանին, Ավետիք Չալաբյանին, Արսեն Մարտոյանին, Գոռ Սարգսյանին, Գոռ Մաթևոսյանին, Գևորգ Մուրադյանին, Գերասիմ Վարդանյանին, Դավիթ Ավագյանին, Տարոն Մանուկյանին:
 
Նրանք գտնում են, որ այդ անձանց հանդեպ կիրառվում են քաղաքական բռնաճնշումներ, ապօրինի կալանքներ՝ ավելի քան թույլ և օրենքի պահանջներին ամենևին չհամապատասխանող հիմքերով։ 
 
«5165 շարժման» առաջնորդ Կարին Տոնոյանի խոսքով՝ քաղբանտարկյալները ցանկացած նորմալ երկրում արտառոց երևույթ են, և, առավել ևս մեր երկրում, որի ղեկավարներն իրենց հռչակել են ժողովրդավարության ջատագովներ, ուղղակի անթույլատրելի բան է.
 
«Մենք բոլորս շատ լավ հասկանում ենք, որ ապրում ենք իշխանությունը բռնազավթված երկրում, որտեղ ամեն ինչ ծառայեցվում է առաջին հերթին քաղաքական նպատակների, իսկ այսօրվա իշխանության նպատակն ամեն գնով իշխանության մնալն է: Սրանով արդեն մեկնաբանելի են թե՛ քաղբանտարկյալների առկայությունը, թե՛, առավել ևս, Ավետիք Չալաբյանի՝ քաղբանտարկյալի կարգավիճակը, որովհետև նա իր և՛ գիտական, և՛ հայրենասիրական նվիրումով և պոտենցիալով մրցակից է իշխանության և քաղաքական դաշտի ցանկացած գործչի համար:
 
Այս առումով շատ նորմալ է, որ իշխանությունները փորձում են վնասազերծել Չալաբյանին, որովհետև նրա նման մարդը վտանգ է ներկայացնում իրենց համար, ցանկացածի համար մրցակցի առավելությունը վտանգ է»,- 1or.am-ի հետ զրույցում ասաց Տոնոյանը:
 
Մեր հարցին՝ արդյոք կոնկրետ Չալաբյանի ա՞նձն է թիրախում, Տոնոյանը պատասխանեց.
 
«Այո, ես համարում եմ, որ նրանց թիրախը հենց Չալաբյանի անձն է, որովհետև այսօր շատ քիչ են մաքուր և անկախ մարդիկ, քաղաքականության մեջ շատ հեշտ է այսօր մանևրել, որովհետև միշտ կան պատճառներ՝ այս կամ այն թևին մեղադրելու, նախկին մեղքերն ասպարեզ բերելու: Իսկ Ավետիք Չալաբյանն այդ առումով իր անցյալով, իր ապրածով մաքուր մարդ է, և հետևաբար, իր գոյությունն էլ՝ անցանկալի:
 
Ես գտնում եմ, որ այսօր Հայաստանի ապագայի համար շատ կարևոր են նմանատիպ մարդիկ, որովհետև իմ խորին համոզմամբ Հայաստանի ապագան պատկանում է միայն մաքուր ձեռքերով, մաքուր խղճով, մաքուր անցյալով մարդկանց, և Հայաստանը կարող են վերակերտել միայն այդպիսի մարդիկ»: 
 
Մարիամ Նալբանդյան