Երևանը նախատեսում է եվրոբոնդեր թողարկել. քաղաքապետը հանդիպում է ունեցել
Общество
Երևանի քաղաքապետարանը Եվրոպական ներդրումային բանկի հետ այսօր տարբեր ծրագրեր է իրականացնում քաղաքային տնտեսության մի շարք ոլորտներում։ Երևանի քաղաքապետ Հրաչյա Սարգսյանն ու քաղաքապետի առաջին տեղակալ Լևոն Հովհաննիսյանը երկու կառույցների համագործակցության ընդլայնման հետ կապված հարցեր են քննարկվել Եվրոպական ներդրումային բանկի Հայաստանի պետական հատվածի վարկավորման գործառնությունների պատասխանատու Ստեֆանի Գիար-Բրանի հետ հանդիպման ժամանակ:
Այս մասին տեղեկացնում են Երևանի քաղաքապետարանի աշխատակազմից։
Կարևորելով Եվրոպական ներդրումային բանկի հետ ձևավորված փոխշահավետ համագործակցությունը՝ Երևանի քաղաքապետը նշել է, որ արդեն իսկ կյանքի կոչվող նախագծերը լավ հիմք են նոր նախաձեռնությունների համար: Մասնավորապես, քաղաքապետ Սարգսյանն առանձնացրել է նոր էլեկտրական ավտոբուսների ձեռքբերումը, համայնքային պոլիկլինիկաների վերակառուցումը, մանկապարտեզների հիմնանորոգման ծրագրերի շարունակականության ապահովումն ու մի շարք այլ ծրագրերի իրականացումը, որոնք տվյալ ոլորտներում կապահովեն համալիր լուծումներ: Հրաչյա Սարգսյանը նաև ընդգծել է, որ միջազգային գործընկերների հետ վարկային ու դրամաշնորհային ծրագրերի իրականացման հարցում համայնքն այսօր ունի նաև ՀՀ կառավարության լիարժեք աջակցությունը:
«Շնորհակալություն հայտնելով համագործակցության ընդլայնման պատրաստկամության համար՝ Ստեֆանի Գիար-Բրանն իր հերթին նշել է, որ բանկը պատրաստ է դիտարկելու նոր ծրագրեր, որոնք ուղղված են Երևանի զարգացմանն ու հարմարավետ պայմանների ապահովմանը»,- ասվում է հաղորդագրության մեջ:
Ըստ աղբյուրի՝ քաղաքի կառավարման հարցում ներկայացնելով իր մոտեցումները՝ քաղաքապետ Սարգսյանը նաև տեղեկացրել է, որ առաջին տեղակալի հետ աշխատանքներ են տարվում եվրոբոնդեր թողարկելու ուղղությամբ, մասնագիտացված ընկերությունների ներկայացուցիչների հետ դիտարկվում են հնարավորությունները: Նախաձեռնությունը ոչ միայն կարևոր դերակատարում կունենա քաղաքի տնտեսական զարգացման համար, այլև կարևոր ու գրավիչ գործիք կլինի ներդրողների՝ ինչպես տեղական, այնպես էլ արտասահմանյան շուկայի համար:
