Ամենամեծ դավաճանությունը տեղի է ունեցել Շուշիում, անգամ մեր սեփական «Իսկանդերն» է ուղղվել Շուշիի վրա. Լևոն Մնացականյան /տեսանյութ/
«Ոչ միայն Շուշին, այլև ողջ Արցախը և ՀՀ-ից հանձնվող տարածքներն Ադրբեջանին են ծախվել Նիկոլ-Ալիև դավադրության արդյունքում»,- 168TV-ի «Ռեվյու» հաղորդման ընթացքում ասել է «Հայրենիք» կուսակցության անդամ Լևոն Մնացականյանը:
Նա նշել է, որ «Հայրենիք» կուսակցության ջոկատը Շուշիում կռվել է ՊԲ հրամանատարության ներքո. «Դա եղել է հոկտեմբերի վերջ, նոյեմբեր ամսվա սկզբին: Եթե հիշում եք՝ այս ժամանակ Արայիկ Հարությունյանն Արցախի ԱԱԾ տնօրենի հետ Շուշիից ուղերձով էր հանդես եկել, որ թուրքերն արդեն առավելագույնը 5 կիլոմետրի վրա են Շուշիից: Հադրութը զիջվել էր, թուրքերը մոտեցել էին Շուշիին, բայց անգամ այդ պարագայում, եթե բոլոր կողմերից շրջափակվեր Շուշին, միջանցք չբացելու դեպքում հնարավոր չէր մտնել Շուշի:
ԱԱԾ նախկին տնօրեն Արգիշտի Քյարամյանը, չհանդիսանալով որևէ պետական պաշտոնյա, գտնվել է Արցախում՝ անհասկանալի պատճառներով: Նա հեռացվել էր պաշտոնից, բայց Շուշիում էր: Այնտեղ պատահական հանդիպել է մեր ջոկատի տղաների հետ: Այդ ժամանակ ներկուսակցական հրահանգ կար, և մենք չէինք քննադատում իշխանություններին, մեկ բռունցք դարձած՝ պաշտպանում էինք մեր հայրենիքը:
Արգիշտի Քյարամյանը հանդիպել է մեր տղաներին, բայց շատ տարօրինակ զուգադիպությամբ՝ նա Շուշին լքել է ավելի շուտ, քան «Հայրենիք» զորախմբի տղաները: Բոլորին քաջ հայտնի է, որ նա Արցախը լքել է ինկասացիայի մեքենաներով, և ոչ մեկին մինչև հիմա պարզ չէ՝ որտեղ են անհետացել ԿԲ գումարները, որոնք պահվում էին Շուշիում: Եթե ԱԱԾ նախկին տնօրեն հանդիսացող անձը լքում է որևէ տարածք, գոնե կարող էր Շուշիում կռվող մարդկանց տեղեկացնել, թե ինչ է կատարվելու: Եթե դու կապի մեջ ես ՀՀ քաղաքական ղեկավարության հետ և գոնե ինչ-որ չափով տեղյակ ես, թե ինչ զարգացումներ են սպասվում, գոնե պետք է տեղեկացնեիր այդ ժամանակ Շուշիում գտնվողներին»:
Նրա խոսքով՝ ամենամեծ դավաճանությունը տեղի է ունեցել Շուշիում. «Անգամ մեր սեփական «Իսկանդերն» է ուղղվել Շուշիի վրա: Նոյեմբերի 7-ին ես կապվեցի հարազատներից մեկի հետ, որ գտնվում էր Շուշիի մատույցներում, ուրախության ձայներ էին գալիս, հարցրի՝ ինչ է կատարվում, պատասխանն այն էր, որ Շուշիում մեր տղաները ջարդում են թուրքերին, ամեն ինչ նորմալ է, և փոքրիկ հաղթանակ ենք նշում: Դավադրությունը կայացել է նրանում, որ բոլոր հետաքրքրվողներին ասել են, թե Շուշիում ամեն ինչ նորմալ է, բայց այդ ժամանակ արդեն ադրբեջանցիները գտնվել էին Շուշիում: Տեսանյութերում երևում է, որ հայերը Շուշիից դուրս արդեն կռվում էին Շուշի մտնելու համար»:
Հարցին՝ այդ հասարակ մարդիկ, որ Շուշիից ասել են, թե ամեն ինչ նորմալ է, փոքր հաղթանակ են նշել, ինչո՞ւ են ստել, նա պատասխանել է. «Դա պետական դավաճանության մի մասն է եղել. եղել է նախօրոք պայմանավորվածություն, Շուշին վաճառվել է Ադրբեջանին, և այդ դավաճանական ակտը քողարկելու համար պետք էր ստել: Հասարակ մարդկանց էլ են ասել, որ ստեն, քանի որ Շուշին այն քաղաքն էր, որ եթե համայն հայությունը լսեր, որ Շուշին վտանգված է, բոլորը շարժվելու էին Շուշի: Այդ տակտիկան արդեն կիրառվել էր նույն զորահավաքի ժամանակ, երբ մարդկանց գրանցել էին, ասել էին՝ երբ կարիքը լինի՝ կկանչենք: Մարդկանց նույնիսկ դիրքեր են տարել, բայց հրամանատար չեն ունեցել: Այդ ստելու մարտավարությունը նույն արծրունական «հաղթելու ենք»-ի մասնիկներից է, քանի որ 44 օրվա ընթացքում այդպես էլ չունեցանք ինֆորմացիա, թե իրականում ինչ է կատարվում: Այդ ժամանակ մենք հասարակությանը չտեղեկացրինք, թե ինչ է կատարվում, և դա սխալ էր»:
Մանրամասները՝ 168TV-ի տեսանյութում
