Հայաստանը կանգնած է պատերազմի շեմին. գեներալ Արշակ Կարապետյանը զգուշացնում է

Պատերազմի սպառնալիքը՝ անմիջական իրականություն

Ըստ գեներալ Կարապետյանի, այսօր Ադրբեջանը սրընթաց կերպով զինվում է, իսկ Հայաստանի սահմաններին գրեթե ամենօրյա կրակոցները թաքցվում են։ «Պետք չէ լինել ռազմական մասնագետ կամ վերլուծաբան՝ հասկանալու համար, որ մենք ճգնաժամային իրավիճակում ենք։ Ադրբեջանը վերջին շրջանում միլիարդավոր դոլարների սպառազինություն է ձեռք բերել, իսկ այդ ամենին զուգահեռ Թուրքիայի հետ անցկացնում է համատեղ զորավարժություններ։ Սա ուղղակի նախապատրաստություն է պատերազմի»,– ընդգծում է Կարապետյանը։

Բանակից դեպի ոստիկանություն․ պետության անառողջ տրամաբանությունը

Կարապետյանը մատնանշում է նաև մեկ այլ լրջագույն վտանգ՝ բանակի քայքայումը։ Նրա խոսքերով՝ պայմանագրային զինծառայողները մասսայաբար թողնում են ծառայությունը, մինչդեռ փոխարենը ոստիկանության համակարգը համալրվում է հենց նույն երիտասարդներով։ Սա, ըստ գեներալի, ոչ թե պատահականություն է, այլ իշխանության գիտակցված որոշում՝ թուլացնել բանակը և ուժեղացնել ներպետական վերահսկողության մեխանիզմները։

Ռազմավարական դաշնակիցների հետ հարաբերությունները՝ խզման եզրին

Կարապետյանը նաև ընդգծում է արտաքին քաղաքականության դիվանագիտական ձախողումները։ Նրա խոսքով՝ այսօր միայն Ռուսաստանը և Իրանը կարող են զսպել Ադրբեջանի ագրեսիան, սակայն Հայաստանի իշխանությունը երկուսի հետ էլ խնդիրներ ունի։

Իսրայել-Իրան հակամարտության ֆոնին՝ Հայաստանի լռությունը վտանգավոր է

Արշակ Կարապետյանն իր մտահոգությունն է հայտնում նաև տարածաշրջանային լայնամասշտաբ հակամարտության կապակցությամբ։ Իսրայելի և Իրանի միջև ռազմական գործողությունները, ըստ նրա, ահռելի ռիսկեր են ստեղծում նաև Հայաստանի համար։

Եկեղեցու դեմ արշավը՝ ուշադրություն շեղելու մեխանիզմ

Գեներալն անդրադարձել է նաև ներքաղաքական իրավիճակին՝ կոշտ քննադատության ենթարկելով իշխանությունների վարած հակաեկեղեցական քաղաքականությունը։ Նրա համոզմամբ՝ Եկեղեցու դեմ ուղղված հարձակումները նախատեսված են իրական խնդիրներից հանրային ուշադրությունը շեղելու համար։

Նոր ընդդիմության ժամանակն է

Արշակ Կարապետյանը կոչ է անում ձևավորել իրական, անկախ և անկեղծ ընդդիմություն՝ մերժելով ներկայիս կեղծ քաղաքական դաշտը։ Նա վստահ է՝ ներկայիս իշխանության հետ հնարավոր է միայն կոշտ հակազդեցություն։ «Գալու է պահը, և մենք այսօրվա ղեկավարության հետ շատ կոշտ ենք լինելու։ Այդ պահը գալիս է։ Մենք դրան պատրաստ ենք»,– հնչեցնում է գեներալը՝ որպես հստակ ուղերձ։