FEAS Չեմպիոնների լիգայի բրոնզե մրցանակն Ամերիաբանկինն է
SocityԵվրո-ասիական կապիտալի շուկաների միությանամենամյա ConFEAS 2025 հոբելյանական 30-րդ համաժողովը Երևանում էր։ FEAS Չեմպիոնների լիգայի մրցանակաբաշխությանն Ամերիաբանկն արժանացավ բրոնզե մրցանակի պարտատոմսերի շուկայում ակտիվության համար։
Իրադարձությունը բացառիկ է, քանի որ առաջին անգամն է, երբ հայաստանյան ֆինանսաբանկային ոլորտի որևէ կազմակերպություն արժանանում է այս հեղինակավոր մրցանակին։ Համաժողովի շրջանակում ոլորտի առաջատար 300 մասնակիցները հնարավորություն ունեցան ուսումնասիրելու ժամանակակից կապիտալի շուկաները ձևավորող վերջին միտումները, մարտահրավերներն ու նորարարությունները։
Ամերիաբանկի արտարժութային և բրոքերային գործառնությունների գծով համատնօրեն Դիանա Հակոբյանի խոսքով՝ մեծ պատիվ է ստանալ այս հեղինակավոր մրցանակը։ «Այն պարտատոմսերի շուկայում տարածաշրջանի մակարդակով ակտիվության համար տրվող մրցանակ է ու նշանակալի է ոչ միայն Ամերիաբանկի, այլև Հայաստանի կապիտալի շուկայի և տնտեսության համար։ Այս մրցանակը նպաստելու է Հայաստանի կապիտալի շուկայի նկատմամբ վստահության և հետաքրքրության աճին թե՛ միջազգային, թե՛ տեղական ներդրողների կողմից»,- ասել է նա՝ հավելելով, որ մրցանակը ստանալուն նպաստել է նաև բանկի MyInvest ներդրումային հարթակը։
«MyInvest ներդրումային հարթակը հասանելիություն է ապահովում միաժամանակ 30-ից ավելի միջազգային ֆինանսական շուկաների և 20,000-ից ավելի բաժնետոմսերի ու պարտատոմսերի, այսպիսով հաճախորդներին հնարավորություն է ընձեռվում իրականացնել բազմաթիվ գործարքներ այդ թվում պարտատոմսերի շուկայում, ցուցաբերել մեծ ակտիվություն և դրանով իսկ նպաստել բորսայի ակտիվության բարձրացմանը»,- մանրամասնել է Հակբոյանը։
ConFEAS 2025 հոբելյանական 30-րդ համաժողովն անցկացվեց Երևանում մայիսի 30-ից 31-ը։ Այն հյուրընկալեց ոլորտի շուրջ 300 առաջատար մասնագետի եվրասիական երկրների ֆոնդային բորսաներից, կենտրոնական դեպոզիտարիաներից, բանկերից, կարգավորող մարմիններից, ներդրումային ընկերություններից և միջազգային ֆինանսական հաստատություններից:
