Էրդողանը սրում է հարաբերություններն Իսրայելի հետ
Politics
Թուրքիան կարող է մտնել Իսրայել, ինչպես դա արեց Լիբիայում և Լեռնային Ղարաբաղում, պաղեստինցիներին օգնելու համար։ Երեկ Ռիզե քաղաքում, իշխող «Արդարություն և զարգացում» կուսակցության ժողովում, հայտարարել է Թուրքիայի նախագահ Ռեջեփ Թայփ Էրդողանը։
Թուրքիայի նախագահը հայտարարել է, թե իրենք պետք է շատ ուժեղ լինեն, որպեսզի Իսրայելը չկարողանա անհեթեթ գործողություններ անել Պաղեստինում։ «Ինչպես մտանք Ղարաբաղ, ինչպես մտանք Լիբիա, նույնը կարող ենք նրանց նկատմամբ անել։ Չկա որևէ պատճառ, թե ինչու մենք չենք կարող դա անել։ Մենք պետք է այնքան ուժեղ լինենք, որպեսզի կարողանանք այդ քայլերը ձեռնարկել», - հավելել է Էրդողանը։
Առաջին անգամը չէ, որ Թուրքիան ուղիղ խոստովանում է իր մասնակցությունն Արցախի դեմ ագրեսիա սանձազերծելու մեջ։ 44-օրյա պատերազմի օրերին Անկարան կիսահերքումներ էր տարածում, բայց դրանից հետո բոլոր կալիբրի գործիչների շուրթերով խոստովանել է իր անմիջական մասնակցությունը․ Ադրբեջանը պատերազմում աջակցություն էր ստանում թե՛ Թուրքիայից, և թե՚ Իսրայելից։
Իսրայելն այսօր էլ ակտիվորեն զինում է Ադրբեջանին։ Ուշագրավն Էրդողանի խոսքում ենթաշերտերն են։ Իր այս խոսքով նա նախ զգուշացնում է Ալիևին և Ադրբեջանին, հիշեցնում, թե ում են պարտական Հայաստանի նկատմամբ տարած հաղթանակի համար։ Մյուս կողմից էլ փորձում մահմեդական աշխարհի պաշտպան ներկայանալ՝ թիրախավորելով Իսրայելին։ Բնական է, որ Թուրքիան էլ փորձի հարձակում գործել Իսրայելի վրա։
Դրա հետևանքները չափազանց մեծ են լինելու ողջ տարածաշրջանի, այդ թվում՝ Թուրքիայի համար։ Բայց սադրելով Իսրայելին, սպառնալիքներ տեղալով՝ Թուրքիայի նախագահը փորձում է գերազանցություն ստանալ տարածաշրջանի մահմեդական երկրներում, դառնալ տարածաշրջանային գերտերություն։ Ինչին, թերևս, խանգարում է Իսրայելը։
Աննա Շահբազյան
