Օրբանն Ադրբեջանում գտնվելու ժամանակ «գաղտնի» նամակ է ուղարկել ԵՄ ղեկավարությանը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հունգարիայի վարչապետ Վիկտոր Օրբանը, որը հուլիսի սկզբից այսպես կոչված «խաղաղարար առաքելություն» է իրականացնում Կիևում, Մոսկվայում և Պեկինում, ոչ հրապարակային նամակ է գրել ԵՄ ղեկավարությանը՝ ներկայացնելով Ուկրաինայի և Ռուսաստանի նախագահներ Վլադիմիր Զելենսկու և Վլադիմիր Պուտինի հետ իր հանդիպումների մանրամասները և Կրեմլի դիրքորոշումը Ուկրաինայի դեմ պատերազմի վերաբերյալ։

Այս մասին հայտնել է svoboda.org-ը՝ նշելով, որ խմբագիրները փաստաթուղթը ստացել են եվրոպացի մի պաշտոնյայից, որը ցանկացել է անհայտ մնալ։

Նամակը թվագրված է հուլիսի 5-ով և ուղարկվել է Ադրբեջանից, որտեղ Հունգարիայի վարչապետն այցելել էր Մոսկվայից հետո, որպեսզի օկուպացված Շուշի քաղաքում մասնակցեր Թյուրքական պետությունների կազմակերպության ոչ պաշտոնական գագաթնաժողովին։ Փաստաթուղթն ուղղված է Եվրոպական խորհրդի նախագահ Շառլ Միշելին և ԵՄ անդամ երկրների ղեկավարներին։

Ըստ նամակի՝ Կրեմլը վստահ է, որ «ժամանակը ոչ թե Ուկրաինայի, այլ ռուսական ուժերի կողմն է»։ Հունգարիայի վարչապետի խոսքով՝ Պուտինը, իր հետ զրույցում, Ուկրաինայի զինված ուժերի կորուստները գնահատել է ամսական 40-50 հազար մարդ։ Սակայն, միևնույն ժամանակ, նա չի նշել ռուսական կողմի կորուստների թիվը։

«ՌԴ նախագահը զարմացած էր, որ Ուկրաինայի նախագահը մերժել է ժամանակավոր զինադադարի գաղափարը»,- գրել է Օրբանը։ Միևնույն ժամանակ, Մոսկվան, նրա խոսքով, պատրաստ է «դիտարկել հրադադարի ցանկացած առաջարկ, որը չի ծառայի ուկրաինական ուժերի գաղտնի վերադասավորմանը և վերախմբավորմանը»։

Օրբանի խոսքով՝ ինքը Պուտինի հետ քննարկել է, այսպես կոչված «չին-բրազիլական խաղաղության պլանը» (Չինաստանի և Բրազիլիայի միջև ուկրաինական ճգնաժամի քաղաքական կարգավորման ընդհանուր համաձայնագրերը)։ Ըստ Հունգարիայի վարչապետի՝ «ռուսական կողմի քննարկում է այս ծրագիրը»։

Հունգարիայի վարչապետը կարծում է, որ Եվրոպան պետք է հանդես գա Ուկրաինայի դեմ Ռուսաստանի պատերազմում խաղաղարար գործընթացներ սկսելու նախաձեռնությամբ։

«Եթե մենք չկարողանանք զսպել կամ կասեցնել այս գործընթացը (Ուկրաինայի պատերազմը.-Խմբ.), ապա առաջիկա երկու ամսվա ընթացքում մենք ականատես կլինենք առաջնագծում ավելի ողբերգական կորուստների և ռազմական իրադարձությունների», - ասվում է Օրբանի նամակում:

Հուլիսի 2-ին Օրբանը Կիևում հանդիպել է Ուկրաինայի նախագահ Վլադիմիր Զելենսկու հետ։ Այդ օրը Ուկրաինայի ղեկավարի հետ համատեղ մամուլի ասուլիսում Հունգարիայի կառավարության ղեկավարը նշել է, որ Բուդապեշտը բարձր է գնահատում Կիևի՝ խաղաղության հասնելու նախաձեռնությունները, սակայն կարծում է, որ դրանց իրականացումը շատ ժամանակ կպահանջի։ Օրբանմը Զելենսկուն առաջարկել էր մտածել ժամանակավոր հրադադարի մասին:

Հուլիսի 5-ին Օրբանը չհայտարարված այց է կատարել Մոսկվա, որտեղ հանդիպել է երկրի նախագահ Վլադիմիր Պուտինի հետ։ Օրբանի խոսքով՝ ինքը նույն առաջարկն արել էր նաև Պուտինին:

Հուլիսի 8-ին Օրբանը մեկնել է Պեկին, որտեղ  հանդիպում է ունեցել Չինաստանի ղեկավար Սի Ծինփինի հետ։ Բանակցությունների հիմնական թեման, ըստ Օրբանի, խաղաղության բանակցություններ սկսելու և ռուս-ուկրաինական պատերազմին վերջ տալն էր: