Նրանք հաստատ հայ չեն եղել. մանիպուլյացիաներն ավելի պարզունակ ու հիմար են դառնում . «Փաստ»

«Փաստ» օրաթերթը գրում է.

Eadaily.com-ը ««Նրանք հաստատ հայ չեն եղել». ժողովրդի վստահությունը կորցնող Փաշինյանը մոլորվել է երկու սոճու արանքում» վերնագրով հոդվածում գրում է, որ նման բան նախկինում երբեք չէր եղել: Նիկոլ Փաշինյանը Արագածոտնի մարզում «Քաղաքացիական պայմանագիր» կուսակցության նիստում հայտարարել է իշխանությունների ոճրագործության մասին, բայց հասկացրել, որ դրանում շեֆերը մեղավոր չեն։ «Առաջին անգամ պետք է հրապարակավ հայտարարեմ, որ եթե մենք հանցագործություն ենք կատարել, ապա դա եղել է այն, որ պատշաճ կերպով չենք լսել ժողովրդի ձայնը, - ասել է վարչապետը ցավով, ապա խորաթափանցության շողեր հղելով ժողովրդին՝ բովանդակալից ավելացրել,- որովհետև ամեն տուն, որ մտել ենք վերջին քսան տարում, խաղաղության կենաց կար։

Մենք պետք է հասկանայինք, որ դա ուղերձ է ժողովրդի կողմից։ Ժողովուրդը իշխանության գործատուն է, իշխանությանն ասում է այն, թե ինչ պետք է անի։ Եվ եթե մենք բավականաչափ կապված լինեինք մեր ժողովրդի հետ, կհասկանայինք, որ այդ պատվերն է տրվում քաղաքականությամբ զբաղվող մարդկանց»։ Ըստ Նիկոլ Վովաևիչի, իշխանությունների հանցանքն այն է, որ այդ ուղերձը չի վերլուծվել, իսկ հետո ժողովրդին չի զգուշացվել, որ այն, ինչ պահանջվում է խաղաղության հասնելու համար, շատ տհաճ ու դժվար է: «Մենք դա չասացինք երկու պատճառով: Նախ՝ մենք այդ մեթոդը վստահելի չէինք համարում և չէինք կարողանում համակերպվել դրա հետ սոցիալապես և հոգեբանորեն, և երկրորդ հերթին՝ երևի ենթագիտակցորեն վախենում էինք, որ եթե դա անենք, ապա մեզ կանվանեն հանցագործներ, դավաճաններ, հողատուներ։ Մենք այդ ամենը չենք արել, բայց մեզ այդպես են կոչել»,- ասել է վարչապետը՝ հավելելով, որ «այժմ հիանալի գիտի մարդկանց ցանկությունները, երազանքներն ու իղձերը», և պարտավորված է զգում առաջնորդել նրանց այս դժվարին իրավիճակում, որպեսզի անվնաս կամ նվազագույն կորուստներով դուրս գան «ականապատ դաշտից փոթորկոտ օվկիանոս ընկած իրենց նավակը դեպի խաղաղության նավահանգիստ հասցնելու համար»։

Այստեղ ցանկություն է առաջանում պարզաբանում մտցնել: Լեռնային Ղարաբաղի հանձնումը «հողերի հանձնո՞ւմ» էր, թե՞ ոչ։ Այդ նույն ականապատ դաշտերի քարտեզները Ադրբեջանին հանձնելուց հետո՞ է վարչապետը հիշել ականների մասին, թե՞ այստեղ այլ անալոգիաներ են՝ կապված Սահմանադրության, զինանշանի և օրհներգի առաջիկա փոփոխությունների հետ։ Բայց վերադառնանք «ծրագրային» հայտարարությանը, քանի որ Փաշինյանը նաև նշել է, որ երկրի անվտանգության հիմքը պետք է լինի թե՛ ներքին, թե՛ արտաքին քաղաքականության լեգիտիմությունը: «Այսինքն, ո՞րն է մեր պատկերացումը Հայաստանի տարածքի մասին։ Մենք կարծում ենք, որ պետք է հստակ և միանշանակ արձանագրենք, որ Հայաստանի Հանրապետության տարածքի մեր ըմբռնումը ճիշտ համընկնում է Հայկական ԽՍՀ տարածքի մեր ըմբռնման հետ, և դրա հիման վրա ենք մենք վարում մեր քաղաքականությունը։ Չափազանց կարևոր է, որ մեր քաղաքականությունը հիմնված լինի լեգիտիմության վրա, դա շատ կարևոր գործիք է մեր արտաքին անվտանգության ապահովման համար, քանի որ դա, ըստ էության, Հայաստանի միջազգայնորեն ճանաչված տարածքն է, նրա սահմանները։ Երբ մեր քաղաքականությունը կառուցված է օրինական հիմքի վրա, մեր պաշտպանական մեխանիզմներն ամրապնդվում են»,- հայտարարել է նա։

Այս աբրակադաբրան չորս անգամ անկյունագծով և յոթ անգամ ուղղահայաց կարդալուց հետո էլ ոչինչ չի հասկացվում, և ստիպված դիմեցինք «Արման Աբովյան» Տելեգրամ-ալիքի օգնությանը և ստացանք պատասխան. «Մանիպուլ յացիաներն ավելի պարզունակ ու հիմար են դառնում։ Հորիզոնում հայտնվել է Փաշինյանի նոր նարատիվը, որն առնվազն մարդկանց վրա կոտրում է հակահայկական տեղեկատվական ազդեցության ևս մեկ հատակ։ Ըստ փաշիստների նոր ուսումնական ձեռնարկի, քսան տարի, երբ մարդիկ ԽԱՂԱՂՈՒԹՅԱՆ կենաց էին բարձրացնում, ենթագիտակցորեն ցանկանում էին, որ Արցախը կործանվի, Հայաստանը կազմալուծվի և լիովին կախված դառնա թուրք-ադրբեջանական տանդեմի կամքից։ Թավշյաների վերջին եզրահանգումներով մարդիկ ենթագիտակցաբար ցանկացել են մի հզոր թավշյա ձեռքով աղբարկղը նետել Հայաստանի անկախության հռչակագիրը, երկրի զինանշանից հեռացնել Արարատը և Սահմանադրությամբ ամրագրված Հայ Առաքելական եկեղեցու դերը:

Իսկ ընդհանրապես, գործող իշխանությունները, ավանդույթի համաձայն, դարձյալ ոչ մի բանում մեղավոր չեն, այլ միայն կատարում են Հայաստանի «հպարտ քաղաքացիների» ենթագիտակցական կամքը, ովքեր ամեն խնջույքի ժամանակ բառացիորեն ենթագիտակցորեն պահանջում էին իշխանություններից իրենց վերածել հիմարների ու ծախվածների, «մսի»՝ Թուրքիայի և Ադրբեջանի ախորժակները բավարարելու համար: Չգիտեմ, թե նրանք ինչ խնջույքների ժամանակ են ըմբռնել մարդկանց այդ «թաքուն ցանկությունները», բայց նրանք հաստատ հայ չեն եղել և, ամենայն հավանականությամբ, այդ բոլոր խնջույքները Հայաստանում չեն եղել»։ Կարծես թե ավելացնելու ոչինչ չկա... Բացառությամբ թերևս սրա: Հայաստանում արտահերթ խորհրդարանական ընտրությունների անցկացմանը կողմ է հարցվածների 50,1 %-ը, ընդ որում՝ նրանց թիվը վերջին երկու ամսվա ընթացքում աճել է մոտ 19 %-ով։ Այդպիսին են այս տարվա հունվարին GALLUP-ի կողմից անցկացված սոցիոլոգիական հարցման արդյունքները։ Միևնույն ժամանակ, ըստ հետազոտության արդյունքների, Նիկոլ Փաշինյանին չի վստահում հարցվածների 66,4 %-ը։

Մանրամասները՝ «Փաստ» օրաթերթի այսօրվա համարում